नवका मछुवा कल्याण बोर्ड के पदभार कार्यक्रम मं प्रदीप कैवर्त के उपस्थिति ले मछुवा समाज मं दिखिस जबर उत्साह
रायपुर/बलौदाबाजार (छत्तीसगढ़)।
छत्तीसगढ़ शासन कोति ले नवनियुक्त मछुआ कल्याण बोर्ड के अध्यक्ष आनंद निषाद के पदभार ग्रहण के भव्य कार्यक्रम 30 जुलाई 2026 के राजधानी रायपुर के जोरा स्थित इंदिरा गांधी कृषि विश्वविद्यालय के विवेकानंद सभागृह मं आयोजित करे गिस। ए कार्यक्रम मं प्रदेश भर के मछुआरा समाज के प्रतिनिधि, सामाजिक कार्यकर्ता अउ जनप्रतिनिधि मन भारी संख्या मं उपस्थित रहिन।
समारोह के मुख्य अतिथि कैबिनेट मंत्री रामविचार नेताम रहिन, अउ कार्यक्रम के अध्यक्षता कैबिनेट मंत्री केदार कश्यप हा करिन। अतिविशिष्ट अतिथि के रूप मं रायपुर पश्चिम विधायक राजेश मूणत, पिछड़ा वर्ग आयोग के अध्यक्ष नेहरू निषाद, रायपुर उत्तर विधायक पुरंदर मिश्रा अउ रायपुर महापौर मीनल चौबे उपस्थित रहिन।
कार्यक्रम मं मछुआरा प्रकोष्ठ, छत्तीसगढ़ शासन के प्रदेश संयोजक प्रदीप कैवर्त के उपस्थिति विशेष रूप ले दर्ज करे गिस। ए दौरान ओहा समाज के प्रतिनिधि मन ले मुलाकात करके संगठनात्मक विषय मन ऊपर चर्चा करिन। प्रदीप कैवर्त के उपस्थिति ले समाज के लोगन अउ कार्यकर्ता मन मं जबर उत्साह देखे बर मिलिस।
विभिन्न जिला ले आए मछुआरा समाज के पदाधिकारी अउ कार्यकर्ता मन नवनियुक्त अध्यक्ष आनंद निषाद ला बधाई अउ शुभकामना दीनि। संगे-संग समाज के विकास, मत्स्य पालन ला बढ़ावा देवे, आजीविका ला मजबूत करे अउ कल्याणकारी योजना मन ला सही ढंग ले लागू करे के अपेक्षा घलो जताईन।
सशक्तीकरण के उम्मीद: आयोजन स्थल मं प्रदेश के कोना-कोना ले पहुँचे महिला अउ पुरुष मन के उपस्थिति ले गजब के माहौल बने रहिस। उपस्थित जनसमूह हा मछुआरा समुदाय के सामाजिक अउ आर्थिक सशक्तीकरण मं बोर्ड के सक्रिय भूमिका के आस जताईस।
आनंद निषाद के पदभार संभाले ले मछुआ कल्याण बोर्ड ले जुड़े योजना मन ला अउ प्रभावी ढंग ले लागू करे अउ मत्स्य व्यवसाय ले जुड़े परिवार मन के हित ला प्राथमिकता मिले के उम्मीद जताए जावत हे। पूरा कार्यक्रम शांतिपूर्ण अउ गरिमामय वातावरण मं संपन्न होइस।
